കൊളംബോ: ശ്രീലങ്കന്‍ ക്രിക്കറ്റ് പരിശീലകന്‍ മിക്കി ആര്‍തറിനും ഓപ്പണിംഗ് ബാറ്റ്സ്മാന്‍ ലഹിരു തിരിമാനെയ്ക്കും കോവിഡ് സ്ഥിരീകരിച്ചു. വെസ്റ്റിന്‍ഡീസ് പര്യടനത്തിന് മുന്നോടിയായി കളിക്കാരും കോച്ചിംഗ് സ്റ്റാഫും നെറ്റ് ബൗളര്‍മാരും അടക്കം 36 അംഗ സ്‌ക്വാഡിന് പിസിആര്‍ ടെസ്റ്റ് നടത്തിയിരുന്നു. ഈ പരിശോധനയിലാണ് ഇരുവര്‍ക്കും രോഗം സ്ഥിരീകരിച്ചത്.
ഇതോടെ ശ്രീലങ്കന്‍ ടീമിന്‍റെ വിന്‍ഡീസ് പര്യടനം അനിശ്ചിതത്വത്തിലായി. ഈ മാസം 20നാണ് ശ്രീലങ്കയുടെ വിന്‍ഡീസ് പര്യടനം ആരംഭിക്കുന്നത്. രണ്ട് ടെസ്റ്റും മൂന്നു ഏകദിനവും മൂന്നു ട്വന്‍റി-20യും അടങ്ങുന്നതായിരുന്നു പര്യടനം. ടീം പരിശീലകനടക്കം കോവിഡ് ബാധിച്ചതിനാല്‍ വിന്‍ഡീസ് പര്യടനം മാറ്റിവെച്ചേക്കുമെന്നാണ് റിപ്പോര്‍ട്ടുകള്‍.
