കൊച്ചി: ദുര്‍ഗാദേവിയെ അപമാനിക്കുന്ന തരത്തില്‍ ഫോട്ടോഷൂട്ട് നടത്തി സമൂഹമാധ്യമങ്ങളില്‍ പോസ്റ്റ് ചെയ്തെന്ന പരാതിയില്‍ യുവതിക്കെതിരെ പോലീസ് കേസ്. ഹിന്ദു ഐക്യവേദിയുടെ പരാതിയില്‍ ആലുവ സ്വദേശിനിയായ ഫോട്ടോഗ്രഫര്‍ക്കെതരേയാണ് കേസ്.
നവരാത്രിയോട് അനുബന്ധിച്ച്‌ യുവതിയെടുത്ത ഫോട്ടോകള്‍ ദുര്‍ഗാദേവിയെ അപമാനിക്കുന്നതാണെന്ന് കാണിച്ചായിരുന്നു ഹിന്ദു ഐക്യവേദി പരാതി നല്‍കിയത്. മടിയില്‍ മദ്യവും കഞ്ചാവും വച്ചിരിക്കുന്ന തരത്തില്‍ ദുര്‍ഗ ദേവിയെ ചിത്രീകരിച്ചു എന്നാണു പരാതി. മോഡലിനെതിരെ പരാതി എടുക്കണോയെന്ന് പരിശോധിച്ചശേഷം തീരുമാനിക്കും. അതേസമയം നവരാത്രി തീമില്‍ ചെയ്ത ഫോട്ടോ ഷൂട്ട് വിശ്വാസികളെ വേദനിപ്പിച്ചത് മനസിലാക്കുന്നെന്നും നിര്‍വ്യാജം ഖേദിക്കുന്നെന്നും യുവതി അറിയിച്ചു.
നവരാത്രിയോട് അനുബന്ധിച്ച്‌ സമൂഹമാധ്യമത്തില്‍ പ്രസിദ്ധീകരിച്ച ചിത്രത്തിനെതിരെയും ഫോട്ടോഗ്രാഫര്‍ക്കെതിരെയും സോഷ്യല്‍ മീഡിയയില്‍ വലിയ ആക്രമണമാണ് നടന്നത്. പരാതി ഉയര്‍ന്നതോടെ പേജില്‍നിന്ന് ചിത്രങ്ങള്‍ നീക്കിയിട്ടുണ്ട്.
