ന്യൂഡല്‍ഹി: ലോകത്ത് കോവിഡ് ബാധിതരുടെ എണ്ണം 10 കോടി കടന്നു. 10,02,80,252 പേര്‍ക്കാണ് ഇതുവരെ കോവിഡ് ബാധിച്ചത്. 21,49,387 പേര്‍ ഇതുവരെ കോവിഡ് ബാധിച്ച്‌ മരിച്ചു. 7,22,89,169 പേരാണ് രോഗമുക്തി നേടിയതെന്നും വേള്‍ഡോ മീറ്ററിന്‍റെ കണക്കില്‍ പറയുന്നു.
യു.എസിലാണ് ഏറ്റവും കൂടുതല്‍ കോവിഡ് ബാധിതര്‍. 2,58,61,597 പേര്‍ക്കാണ് യു.എസില്‍ ഇതുവരെ കോവിഡ് ബാധിച്ചത്. കോവിഡ് ബാധിതര്‍ ഏറ്റവും കൂടുതലുള്ള രണ്ടാമത്തെ രാജ്യം ഇന്ത്യയാണ്. 1,06,77,710 പേര്‍ക്കാണ് രാജ്യത്ത് ഇതുവരെ കോവിഡ് ബാധിച്ചത്. ബ്രസീല്‍, റഷ്യ, യു.കെ, ഫ്രാന്‍സ്, സ്പെയിന്‍, ഇറ്റലി, തുര്‍ക്കി, ജര്‍മനി തുടങ്ങിയവയാണ് കോവിഡ് ബാധിതര്‍ ഏറ്റവും കൂടുതലുള്ള മറ്റു രാജ്യങ്ങള്‍.
അതേസമയം, യു.കെയിലും ദക്ഷിണാഫ്രിക്കയിലും ജനിതകമാറ്റം സംഭവിച്ച കൊറോണ വൈറസ് പടര്‍ന്നുപിടിക്കുന്നത് ലോകരാജ്യങ്ങളെ ആശങ്കയിലാഴ്ത്തുന്നുണ്ട്. അതിതീവ്ര കൊറോണ വൈറസ് ഇന്ത്യയുള്‍പ്പെടെ 50ല്‍ അധികം രാജ്യങ്ങളില്‍ സ്ഥിരീകരിക്കുകയും ചെയ്തിട്ടുണ്ട്. യഥാര്‍ഥ കൊറോണ ൈവറസിനേക്കാള്‍ 30 ശതമാനം മരണസാധ്യത കൂടുതലാണ് അതിതീവ്ര വൈറസിന്. കൂടാതെ 70 ശതമാനത്തിലധികം അതിതീവ്ര വ്യാപന ശേഷിയുണ്ടെന്നതും ആശങ്ക വര്‍ധിപ്പിക്കുന്നു.
കൊറോണ വൈറസ് പ്രതിരോധത്തിനായി ഇന്ത്യയുള്‍പ്പെടെ വാക്സിന്‍ വിതരണം ആരംഭിച്ചത് ആശ്വാസം നല്‍കുന്നു. രാജ്യത്ത് രണ്ടു വാക്സിനുകള്‍ക്കാണ് അടിയന്തര ഉപയോഗത്തിന് അനുമതി നല്‍കിയത്. കോവിഷീല്‍ഡ്, കോവാക്സിന്‍ എന്നിവയാണവ.
