വാഷിംഗ്ടണ്‍ ഡി സി : ജനുവരി 20 ന് ബൈഡന്‍ അമേരിക്കന്‍ പ്രസിഡന്റായി സത്യപ്രതിജ്ഞ ചെയ്യുന്ന ചടങ്ങ് സുഗമമായി നടത്തുന്നതിനാവശ്യമായ മുന്‍കരുതലുകള്‍ സ്വീകരിക്കുന്നതിന് ഹോം ലാന്റ് സെക്യൂരിറ്റി ആന്റ് ഫെഡറല്‍ ഏജന്‍സി മാനേജ്മെന്റിന് പൂര്‍ണ്ണ അധികാരം നല്‍കുന്നതിനുള്ള എക്സിക്യൂട്ടിവ് ഉത്തരവില്‍ പ്രസിഡന്റ് ട്രംപ് ഒപ്പുവെച്ചു. ജനുവരി 11 മുതല്‍ 24 വരെയാണ് ഈ ഉത്തരവിന് പ്രാബല്യം.
ബൈഡന്‍ അധികാരമേല്‍ക്കുന്ന ജനുവരി 28 ന് വ്യാപകമായ പ്രകടനങ്ങളും സംഘര്‍ഷാവസ്ഥയും ഉണ്ടാകുമെന്ന മുന്നറിയിപ്പിനെ തുടര്‍ന്നാണ് ട്രംപ് എക്സിക്യൂട്ടിവ് ഉത്തരവിറക്കിയത്. ലോക്കല്‍ ഗവണ്‍മെന്റുമായി സഹകരിച്ച്‌ ആവശ്യമായ സുരക്ഷ ഉറപ്പു വരുത്തണമെന്നും ഉത്തരവില്‍ പറയുന്നു. കാപ്പിറ്റോള്‍ ബില്‍ഡിംഗിലേക്ക് ഇരച്ചുകയറിയ ട്രംപ് അനുകൂലികള്‍ നടത്തിയ അക്രമപ്രവര്‍ത്തനങ്ങളില്‍ അഞ്ചു പേര്‍ മരിക്കാനിടയായ സാഹചര്യം ആവര്‍ത്തിക്കാതിരിക്കുന്നതിന് രാജ്യ തലസ്ഥാനത്തും 50 സംസ്ഥാന തലസ്ഥാനങ്ങളിലും വിപുലമായ സുരക്ഷാ നടപടികളാണ് സ്വീകരിച്ചിരിക്കുന്നത്.
കോവിഡ് 19 വ്യാപകമാകുന്നതിന്റെയും കഴിഞ്ഞ ആഴ്ച നടന്ന പ്രതിഷേധ പ്രകടനത്തിന്റെയും സാഹചര്യം ഒഴിവാക്കുന്നതിന് തലസ്ഥാന നഗരിയിലേക്ക് വരാതിരിക്കുന്നതാണ് നല്ലതെന്നും വീടുകളില്‍ കഴിയണമെന്നും ഡിസ്ട്രിക്‌ട് ഓഫ് കൊളംബിയ മേയര്‍, വെര്‍ജീനിയ ഗവര്‍ണര്‍, മേരിലാന്റ് ഗവര്‍ണര്‍ എന്നിവര്‍ സംയുക്ത പ്രസ്താവനയില്‍ ആവശ്യപ്പെട്ടു.
