മുംബൈ: മോട്ടോര്‍ വാഹന ഇന്‍ഷുറന്‍സ് തട്ടിപ്പ് കേസില്‍ മൂന്ന് പേര്‍ അറസ്റ്റില്‍. ഇരുചക്രവാഹനങ്ങളുടെ വിശദാംശങ്ങള്‍ ഉപയോഗിച്ചാണ് തട്ടിപ്പ് നടത്തിയതെന്ന് മുംബൈ ക്രൈംബ്രാഞ്ച് അറിയിച്ചു. ഇരുചക്രവാഹനങ്ങളുടെ വിശദാംശങ്ങള്‍ ഉപയോഗിച്ച്‌ മുച്ചക്ര, നാലുചക്ര വാഹനങ്ങള്‍ക്ക് ഇന്‍ഷുറന്‍സ് പോളിസി എടുത്തുകൊടുത്താണ് തട്ടിപ്പ് നടത്തിയത്. ഇന്‍ഷുറന്‍സ് കമ്ബനി പോളിസി പരിശോധിച്ചപ്പോഴാണ് തട്ടിപ്പ് കണ്ടെത്തിയത്. തട്ടിപ്പ് നടത്തിയ പോളിസികളിലെല്ലാം ഒരേ മൊബൈല്‍ നമ്ബര്‍ തന്നെയാണെന്ന് കണ്ടെത്തി. കൂടാതെ ഇരുചക്രവാഹനങ്ങളുടെ വിശദാംശങ്ങള്‍ ഉപയോഗിച്ചാണ് മുച്ചക്ര, നാലുചക്ര വാഹനങ്ങള്‍ക്ക് ഇന്‍ഷുറന്‍സ് പോളിസികള്‍ എടുത്തുകൊടുത്തിരിക്കുന്നതെന്നും പരിശോധനയില്‍ തെളിഞ്ഞു. തുടര്‍ന്ന് ഇന്‍ഷുറന്‍സ് കമ്ബനി പൊലീസിനെ സമീപിക്കുകയായിരുന്നു.

തേര്‍ഡ് പാര്‍ട്ടി ഇന്‍ഷുറന്‍സില്‍ ഇന്‍ഷുറന്‍സ് കമ്ബനികള്‍ വാഹനത്തിന്റെ വിശദാംശങ്ങള്‍ വിശദമായി പരിശോധിക്കുന്നത് കുറവാണ്. ഇത് അവസരമായി കണ്ടാണ് ഇവര്‍ മൂന്ന് പേര്‍ തട്ടിപ്പ് നടത്തിയതെന്നും കൂടുതല്‍ അറസ്റ്റ് ഉണ്ടാവുമെന്നും മുംബൈ പൊലീസ് അറിയിച്ചു.

എല്ലാ പോളിസികളിലും നല്‍കിയിരിക്കുന്നത് ഒരേ നമ്ബര്‍ തന്നെയാണ്. ഇതുവഴി വിവിധ പോളിസികളുമായി ബന്ധപ്പെട്ട ചോദ്യങ്ങള്‍ക്ക് തട്ടിപ്പുകാരന്‍ എളുപ്പത്തില്‍ ഉത്തരം പറയാന്‍ സാധിക്കും. ഇതിലൂടെ സംശയം ജനിപ്പിക്കാതെയായിരുന്നു ഇവരുടെ തട്ടിപ്പ് എന്നും പൊലീസ് പറയുന്നു. ഇ-മെയില്‍ ഐഡി, ഫോണ്‍ നമ്ബറുകള്‍ എന്നിവ കേന്ദ്രീകരിച്ച്‌ നടത്തിയ അന്വേഷണത്തിലാണ് പ്രതികള്‍ പിടിയിലായത്. 1.5 കോടി രൂപയുടെ ഇന്‍ഷുറന്‍സ് പോളിസികള്‍ പിടിച്ചെടുത്തതായും പൊലീസ് വ്യക്തമാക്കി.