കൊല്‍ക്കത്ത: പശ്ചിമ ബംഗാള്‍ നിയമസഭ തെരഞ്ഞെടുപ്പിന് മുന്നോടിയായി മുഖ്യമന്ത്രി മമത ബാനര്‍ജിക്ക് തലവേദനയായി തൃണമൂല്‍ കോണ്‍ഗ്രസില്‍നിന്ന് പുതിയ രാജി. മുന്‍ ഇന്ത്യന്‍ ക്രിക്കറ്റ് താരം കൂടിയായ ലക്ഷ്മി രത്തന്‍ ശുക്ല കായിക മന്ത്രിസ്ഥാനം രാജിവെച്ചു. നിരവധി നേതാക്കള്‍ തൃണമൂല്‍ വിട്ട് ബി.ജെ.പിയിലേക്ക് ചേക്കേറുന്നതിനിടെയാണ് 39 കാരനായ ലക്ഷ്മി രത്തന്‍ ശുക്ലയുടെ രാജിയും.
കായിക മന്ത്രിസ്ഥാനം രാജിവെക്കുന്നുവെന്ന കത്ത് മമതക്കും ഗവര്‍ണര്‍ ജഗ്ദീപ് ധന്‍കറിനും അയച്ചതായി പി.ടി.ഐ റിപ്പോര്‍ട്ട് ചെയ്തു. രാഷ്ട്രീയത്തില്‍നിന്ന് വിരമിക്കുന്നുവെന്നാണ് കത്തിലെ പരാമര്‍ശം. എന്നാല്‍, തൃണമൂല്‍ നേതാക്കള്‍ക്കിടയില്‍ ബി.ജെ.പി നടത്തുന്ന രാഷ്ട്രീയ കച്ചവടമാണ് രാജിക്ക് പിന്നിലെന്നാണ് വിവരം.
മുന്‍ ഇന്ത്യന്‍ ക്രിക്കറ്റ് താരവും ബംഗാള്‍ രഞ്ജി ടീമിന്‍റെ മുന്‍ ക്യാപ്റ്റനുമായ ശുക്ല 2016ലെ നിയമസഭ തെരഞ്ഞെടുപ്പിന് മുന്നോടിയായാണ് തൃണമൂല്‍ കോണ്‍ഗ്രസില്‍ ചേര്‍ന്നത്. തെരഞ്ഞെടുപ്പില്‍ ഹൗറ മണ്ഡലത്തില്‍നിന്ന് നിയമസഭയിലെത്തി.
തെരഞ്ഞെടുപ്പ് അടുക്കുമ്പോള്‍ തൃണമൂല്‍ കോണ്‍ഗ്രസില്‍ ‘ദീദി’ മാത്രമാകും അവശേഷിക്കുകയെന്ന് കേന്ദ്ര ആഭ്യന്തരമന്ത്രി അമിത് ഷാ ബംഗാള്‍ സന്ദര്‍ശനേത്താട് അനുബന്ധിച്ച്‌ സൂചിപ്പിച്ചിരുന്നു. ഇതിനുപിന്നാലെ തൃണമൂലിന്‍റെ നെടുംതൂണുകളിലൊന്നായ സുവേന്ദു അധികാരി രാജിവെക്കുകയും ബി.ജെ.പിയില്‍ ചേരുകയും ചെയ്തിരുന്നു. സുവേന്ദു അധികാരിക്ക് പിന്നാലെ അദ്ദേഹത്തിന്‍റെ സഹോദരന്‍ സൗമേന്ദു അധികാരിയും ബി.ജെ.പിയിലെത്തി. കഴിഞ്ഞ ആഴ്ചയില്‍ എം.പിമാരും എം.എല്‍.എമാരും ഉള്‍പ്പെടെ 12ഓളം പേര്‍ ബി.ജെ.പിയില്‍ ചേര്‍ന്നിരുന്നു. തെരഞ്ഞെടുപ്പിന് മുമ്പ്‌ മന്ത്രിമാരുള്‍പ്പെടെയുള്ള നേതാക്കളുടെ രാജി തൃണമൂല്‍ കോണ്‍ഗ്രസിന് തിരിച്ചടിയായേക്കും.
