റിയാദ്: സൗദി അറേബ്യയില്‍ പ്രതിദിന കോവിഡ് കേസുകള്‍ കുറഞ്ഞ കണക്കില്‍തന്നെ തുടരുന്നു. തിങ്കളാഴ്ച 94 പേര്‍ക്കാണ് പുതുതായി രോഗബാധ സ്ഥിരീകരിച്ചത്. കോവിഡ് ബാധിച്ച്‌ ചികിത്സയിലായിരുന്ന 10 പേര്‍ രാജ്യത്ത് വിവിധ ഭാഗങ്ങളിലായി മരിച്ചു.
166 രോഗബാധിതര്‍ സുഖം പ്രാപിച്ചു. ഇതോടെ രാജ്യത്ത് റിപ്പോര്‍ട്ട് ചെയ്ത കോവിഡ് കേസുകളുടെ ആകെ എണ്ണം 3,63,155ഉം രോഗമുക്തരുടെ എണ്ണം 3,54,609ഉം ആയി. മരണസംഖ്യ 6256 ആയി ഉയര്‍ന്നു. അസുഖ ബാധിതരായി രാജ്യത്ത് ബാക്കിയുള്ളത് 2290 പേരാണ്. ഇതില്‍ 347 പേര്‍ മാത്രമാണ് ഗുരുതരാവസ്ഥയിലുള്ളത്. ഇവര്‍ രാജ്യത്തെ വിവിധ ആശുപത്രികളിലെ തീവ്രപരിചരണ വിഭാഗത്തിലാണ്. ബാക്കിയുള്ളവരുടെ ആരോഗ്യസ്ഥിതി തൃപ്തികരമാണ്. രാജ്യത്തെ കോവിഡ് മുക്തി നിരക്ക് 97.6 ശതമാനവും മരണനിരക്ക് 1.7 ശതമാനവുമായി തുടരുന്നു.
കഴിഞ്ഞ 24 മണിക്കൂറിനിടെ വിവിധ മേഖലകളില്‍ റിപ്പോര്‍ട്ട് ചെയ്ത പുതിയ കോവിഡ് കേസുകള്‍: റിയാദ് 34, മക്ക 28, കിഴക്കന്‍ പ്രവിശ്യ 15, മദീന ആറ്, വടക്കന്‍ അതിര്‍ത്തി മേഖല മൂന്ന്, അല്‍ജൗഫ് രണ്ട്, നജ്റാന്‍ രണ്ട്, തബൂക്ക്, അസീര്‍, ജീസാന്‍, ഖസീം ഒന്നു വീതം.
