കോട്ടയം: കോട്ടയത്ത് പോലീസ് നടത്തിയ പരിശോധനയില്‍ കാഞ്ഞിരപ്പള്ളി, ചിങ്ങവനം എന്നിവിടങ്ങളില്‍ നിന്ന് 28 കിലോ കഞ്ചാവും നിരവധി ലഹരി വസ്തുക്കളും പിടികൂടി. നാല് പേര്‍ പിടിയിലായി. പിടികൂടിയ ലഹരി വസ്തുക്കള്‍ക്ക് അന്‍പത് ലക്ഷം രൂപ വിലവരുമെന്ന് പോലീസ് പറഞ്ഞു.

ജില്ലാ പോലീസ് മേധാവി ഡി. ശില്‍പയുടെ നിര്‍ദ്ദേശപ്രകാരം നാര്‍ക്കോട്ടിക് സെല്‍ ഡിവൈഎസ്പി ബി. അനില്‍കുമാറിന്റെ നേതൃത്വത്തില്‍ നടത്തിയ പരിശോധനയിലാണ് കഞ്ചാവും ലഹരി വസ്തുക്കളും പിടികൂടിയത്. കാഞ്ഞിരപ്പള്ളി, മുണ്ടക്കയം ഭാഗങ്ങളിലും ചിങ്ങവനം, ചങ്ങനാശ്ശേരി ഭാഗങ്ങളിലും കഞ്ചാവ് എത്തുന്നതായി വിവരം ലഭിച്ചതിനെതുടര്‍ന്ന് ലഹരി വിരുദ്ധ സ്‌ക്വാഡ് നിരീക്ഷിച്ചു വരികയായിരുന്നു.

കാഞ്ഞിരപ്പള്ളി ഭാഗത്ത് വില്‍പ്പന നടത്തുന്ന പായിപ്പാട് കുന്നന്താനം തുണ്ടിയില്‍ വീട്ടില്‍ ജെബി ജെയിംസ് (30), നെടുമുടി കല്ലൂപ്പറമ്ബില്‍ വീട്ടില്‍ വിനോദ് ഔസേപ്പ് (28) എന്നിവരെ 20 കിലോ കഞ്ചാവുമായി കാഞ്ഞിരപ്പള്ളി പ്രൈവറ്റ് ബസ് സ്റ്റാന്റില്‍ നിന്നാണ് പോലീസ് പിടികൂടിയത്. പിടികൂടുന്നതിനിടെ കുരുമുളക് സ്പ്രേ ഉപയോഗിക്കാന്‍ ശ്രമിച്ചെങ്കിലും പോലീസ് രണ്ടുപേരെയും പിടികൂടി. ഇവരുടെ പക്കല്‍ നിന്നും 20 കിലോ കഞ്ചാവ്, 200 മില്ലി ഹാഷിഷ് ഓയില്‍, ആംപ്യൂളുകള്‍, നിരോധിത ഗുളികകള്‍, ഇന്‍ജക്ഷനുള്ള സിറഞ്ചുകള്‍ തുടങ്ങിയവയും കണ്ടെടുത്തു.

ചങ്ങനാശ്ശേരി, ചിങ്ങവനം ഭാഗങ്ങളില്‍ ലഹരി വില്‍പന നടത്തിവന്ന പായിപ്പാട് പള്ളിക്കച്ചിറ പ്ലാപ്പള്ളി വീട്ടില്‍ അനീഷ് പി. മാത്യു (31), പായിപ്പാട് കൊച്ചുപറമ്ബ് വീട്ടില്‍ റിയാസ് മോന്‍ (32) എന്നിവരെയാണ് തുരുത്തിയില്‍ നിന്നും പിടികൂടിയത്. ഇവരില്‍ നിന്ന് എട്ട് കിലോ കഞ്ചാവും കാറും ലഹരി വിരുദ്ധ സ്‌ക്വാഡ് പിടികൂടി.

ഡിവൈഎസ്പിമാരായ ബി. അനില്‍കുമാര്‍ വി.ജെ. ജോഷി, എന്‍.സി. രാജ്മോഹന്‍ എന്നിവരുടെ നിര്‍ദ്ദേശപ്രകാരം കാഞ്ഞിരപ്പള്ളി എസ്‌എച്ച്‌ഒ എന്‍. ബിജു, എസ്‌ഐ എല്‍ദോ പോള്‍, മുണ്ടക്കയം എസ്‌എച്ചഒ സാഗര്‍, ചിങ്ങവനം എസ്‌എച്ച്‌ഒ കെ. കണ്ണന്‍, എസ്‌ഐ അനീഷ്, ലഹരി വിരുദ്ധ സ്‌ക്വാഡ് അംഗങ്ങളായ എസ്‌ഐ ടി. ശ്രീജിത്ത്, ബിജോയ്, സീനിയര്‍ സിവില്‍ പോലീസ് അംഗങ്ങളായ പ്രതീഷ് രാജ്, ശ്രീജിത് ബി. നായര്‍, കെ.ആര്‍. അജയകുമാര്‍, വി.കെ. അനീഷ്, തോംസണ്‍ കെ. മാത്യു, എസ്. അരുണ്‍, ഷമീര്‍സമദ്, പി.എം. ഷിബു, സൈബര്‍ സെല്‍ ഉദ്യോഗസ്ഥരായ ശ്യാം എസ്. നായര്‍, ജോബിന്‍സ്, അഭിലാഷ് എന്നിവരാണ് പ്രതികളെ പിടികൂടിയത്.