ന്യൂഡല്‍ഹി: കോവിഡ്​ പ്രതിരോധ വാക്​സിന്‍ വിതരണ നയത്തില്‍ പ്രധാനമന്ത്രി നരേന്ദ്രമോദിയെ വിമര്‍ശിച്ച്‌​ പഞ്ചാബ്​ മുഖ്യമന്ത്രി അമരീന്ദര്‍ സിങ്​. രാജ്യത്ത്​ നിലവില്‍ കോവിഷീല്‍ഡ്​, കോവാക്​സിന്‍ എന്നിവക്ക്​ മാത്രമാണ്​ അനുമതി. ഇന്ത്യയില്‍ വാക്​സിന്‍ ക്ഷാമം നേരിടുന്ന സമയത്ത്​ മറ്റു രാജ്യങ്ങള​ിലേക്ക്​ കയറ്റി അയക്കുന്നതിന്​ പ്രധാന്യം നല്‍കുന്നതിനെതിരെയാണ് വിമര്‍ശനം. ഇന്ത്യക്കാര്‍ക്ക്​ ആദ്യം വാക്​സിന്‍ നല്‍കുന്നതിന്​ കേന്ദ്രം പ്രാധാന്യം നല്‍കണമെന്ന്​ അദ്ദേഹം പറഞ്ഞു.

‘അഞ്ചുകോടി വാക്​സിന്‍ മറ്റു രാജ്യങ്ങള്‍ക്ക്​ സമ്മാനിച്ചതിന്‍റെ അര്‍ഥമെന്താണ്​? നമ്മുടെ കാര്യം എന്താണ്​? ഇന്ത്യക്കാരുടെ കാര്യം എന്താണ്​? നമുക്ക്​ ആദ്യം അത്​ ലഭിക്കുന്നില്ലേ? മറ്റുള്ളവര്‍ക്ക്​ വാക്​സിന്‍ നല്‍കണമെന്നോ നല്‍കരുതെന്നോ ഞാന്‍ പറയുന്നില്ല, പക്ഷേ ഇന്ത്യക്കാര്‍ക്ക്​ മുന്‍ഗണന നല്‍കണം​’ -അമരീന്ദര്‍ സിങ്​ പറഞ്ഞു.

പ്രതിദിനം വാക്​സിനേഷന്‍ രണ്ടുലക്ഷത്തോളം ഉയര്‍ത്തണമെന്ന്​ കേന്ദ്രം ആവശ്യപ്പെടുന്നു. എന്നാല്‍ ഇത്തരത്തില്‍ ഉയര്‍ത്തിയാല്‍ ഒന്നര ദിവസത്തിനുള്ളില്‍ വാക്​സിന്‍ തീരുമെന്നും അദ്ദേഹം കൂട്ടിച്ചേര്‍ത്തു.

​ഒ​ാരോ സംസ്​ഥാനങ്ങളിലെയും സ്​ഥിതി വ്യത്യസ്​തമാണ്​. ഡല്‍ഹിയിലെ സ്​ഥിതിയല്ല, മഹാരാഷ്​ട്രയിലും കേരളത്തിലും. അവിടങ്ങളിലെപ്പോലെയല്ല പഞ്ചാബില്‍. അതിനാല്‍ ​സംസ്​ഥാനങ്ങള്‍ക്ക്​ മുന്‍ഗണന ക്രമം തീരുമാനിക്കാന്‍ അവസരം നല്‍കണമെന്നും അദ്ദേഹം പറഞ്ഞു.

രാജ്യത്ത്​ മൂന്നുദിവസമായി രണ്ടുലക്ഷത്തിലധികം പേര്‍ക്കാണ്​ കോവിഡ്​ സ്​ഥിരീകരിക്കുന്നത്​. കഴിഞ്ഞദിവസം 1300 മരണവും രാജ്യത്ത്​ സ്​ഥിരീകരിച്ചിരുന്നു. പഞ്ചാബ്​ ഉള്‍പ്പെടെ 10 സംസ്​ഥാനങ്ങളിലാണ്​ 86 ശതമാനം മരണവും.