തൃശൂര്‍: പൂരം വിളംബരത്തിന് തെക്കേഗോപുര നട തള‌ളിത്തുറന്ന് നെയ്‌തലക്കാവ് ഭഗവതി ഇത്തവണ എത്തുക തെച്ചിക്കോട്ടുകാവ് രാമചന്ദ്രന്റെ പുറത്തേറിയാകില്ല, കൊച്ചിന്‍ ദേവസ്വംബോര്‍ഡിന്റെ തലയെടുപ്പുള‌ള ഉയരക്കേമന്‍ എറണാകുളം ശിവകുമാറിനാണ് ഇത്തവണ പൂരവിളംബരം നടത്താനുള‌ള ഭാഗ്യം ലഭിച്ചിരിക്കുന്നത്. ഉയരംകൊണ്ടും തലയെടുപ്പുകൊണ്ടും കൊച്ചിന്‍ ദേവസ്വംബോര്‍ഡിന്റെ ഒന്നാമനായ ആനയാണ് ശിവകുമാര്‍.

തെച്ചിക്കോട്ടുകാവ് രാമചന്ദ്രനെ എഴുന്നള‌ളിപ്പില്‍ നിന്ന് വിലക്കി വനംവകുപ്പ് ഉത്തരവുള‌ളതിനാലാണ് നെയ്‌തലക്കാവ് ദേവസ്വം ഇത്തവണ ശിവകുമാറിന് അവസരം നല്‍കിയത്. കേരളത്തിലെ നാടന്‍ ആനകളിലും മികച്ച ഉയരവും എഴുന്നള‌ളിപ്പുകളില്‍ തലയെടുത്ത് നില്‍ക്കാനുള‌ള കഴിവുമുള‌ള ശിവകുമാറിന് പത്തടിയിലേറെ ഉയരമുണ്ട്. ഒറ്റ‌കൊമ്ബനാണ്.

പൂരം നാളില്‍ കണിമംഗലം ശാസ്‌താവിന് വടക്കുംനാഥ ക്ഷേത്രത്തിലേക്ക് പ്രവേശിക്കാനായി പൂരത്തലേന്ന് തെക്കേ ഗോപുര നട നെയ്‌തലക്കാവ് ഭഗവതി തുറന്നിടുന്ന ചടങ്ങാണ് ശിവകുമാര്‍ നിര്‍വഹിക്കുക. ആദ്യകാലങ്ങളില്‍ അധികം അറിയപ്പെടാത്ത ചടങ്ങ് തെച്ചിക്കോട്ടുകാവ് രാമചന്ദ്രന്‍ വന്നതോടെ വളരെയധികം ശ്രദ്ധയാകര്‍ഷിച്ചു. കൊച്ചിന്‍ ദേവസ്വത്തിന്റെ ആനകള്‍ തന്നെയായിരുന്നു ആദ്യകാലങ്ങളില്‍ ഈ ചടങ്ങിനുണ്ടായിരുന്നത്.

ഇത്തവണ കൊവിഡിന്റെ കടുത്ത നിയന്ത്രണങ്ങള്‍ക്കിടയിലും പൂരം കേമമാക്കാനുള‌ള ശ്രമത്തിലാണ് പൂരസമിതിയും അധികൃതരും. കഴിഞ്ഞ വര്‍ഷം കൊവിഡ് വ്യാപനം രൂക്ഷമായതിനാല്‍ തൃശൂര്‍പൂരം ചടങ്ങ് മാത്രമായാണ് നടന്നത്.