ചെന്നൈ: തെരഞ്ഞെടുപ്പ് പ്രചാരണത്തിനിടെ തട്ടുകടയില്‍ ദോശ ചുട്ട് നടിയും ബിജെപി സ്ഥാനാര്‍ഥിയുമായ ഖുഷ്ബു സുന്ദര്‍. പ്രചാരണത്തിനിടെ പടിഞ്ഞാറന്‍ മാട തെരുവിലെ വഴിയോര തട്ടുകടയില്‍ കയറി ഖുഷ്ബുവിന്റെ പാചക വൈദഗ്ധ്യം തെളിയിക്കുകയായിരുന്നു. ഖുഷ്ബു ദോശ ചുടുന്നതിന്റെ ചിത്രങ്ങള്‍ പുറത്തുവന്നു. ചെന്നൈയിലെ തൗസന്‍റ് ലൈറ്റ് മണ്ഡലത്തില്‍നിന്നാണ് ഖുഷ്ബു ജനവിധി തേടുന്നത്.
തമിഴ്നാട്ടിലെ തെരഞ്ഞെടുപ്പില്‍ നിരവധി നേതാക്കളാണ് വ്യത്യസ്ത പ്രചാരണ തന്ത്രങ്ങളുമായി രംഗത്തെത്തുന്നത്. കുറച്ചുദിവസം മുമ്ബ് നാഗപട്ടണത്തെ അണ്ണാ ഡി.എം.കെ സ്ഥാനാര്‍ഥി തങ്ക കതിരവന്‍ തുണി അലക്കുന്ന വിഡിയോ പുറത്തുവന്നിരുന്നു. കഴിഞ്ഞദിവസം എ.ഐ.ഡി.എം.കെ സ്ഥാനാര്‍ഥിയും മന്ത്രിയുമായ എസ്.പി. വേലുമണിയുടെ തെരഞ്ഞെടുപ്പ് പ്രചാരണത്തിനിടെ യോഗ അദ്ധ്യാപകന്‍ തലകുത്തിനിന്ന് കാര്‍ കെട്ടിവലിച്ചത് വാര്‍ത്തയായിരുന്നു. തഞ്ചാവൂര്‍ മണ്ഡലത്തിലെ സ്വതന്ത്ര സ്ഥാനാര്‍ഥി സന്തോഷ് നാമനിര്‍ദ്ദേശ പത്രിക സമര്‍പ്പിക്കാനെത്തിയത് തണ്ണിമത്തനും കൊണ്ടായിരുന്നു. തനിക്ക് തണ്ണിമത്തന്‍ തെരഞ്ഞെടുപ്പ് ചിഹ്നമായി അനുവദിക്കണമെന്ന് ആവശ്യപ്പെട്ടായിരുന്നു ഈ നീക്കം.
ആലന്‍ഗുളം മണ്ഡലത്തിലെ സ്ഥാനാര്‍ഥി ഹരി നാടാര്‍ 4.25 കിലോ സ്വര്‍ണം ധരിച്ചുകൊണ്ടായിരുന്നു നാമനിര്‍ദ്ദേശ പത്രിക സമര്‍പ്പിക്കാനെത്തിയത്. ഏതു വിധേനയും വോട്ടര്‍മാരെ സ്വാധീനിക്കാന്‍ തന്ത്രങ്ങള്‍ പയറ്റുകയാണ് സ്ഥാനാര്‍ഥികള്‍. ഏപ്രില്‍ ആറിന് ഒറ്റഘട്ടമായാണ് തമിഴ്നാട്ടില്‍ നിയമസഭ തെരഞ്ഞെടുപ്പ്. മെയ്‌ രണ്ടിന് ഫലമറിയാം. 234 മണ്ഡലങ്ങളിലേക്ക് നടക്കുന്ന തെരഞ്ഞെടുപ്പില്‍ കോണ്‍ഗ്രസ് -ഡി.എം.കെ സഖ്യവും ബിജെപി -എ.ഐ.ഡി.എം.കെ സഖ്യവും തമ്മിലാണ് പ്രധാന മത്സരം.
