റിയാദ്: തൊഴില്‍, വിസാ നിയമ ലംഘനങ്ങള്‍ക്ക് പിടിയിലായി റിയാദിലെയും ദമ്മാമിലെയും നാടുകടത്തല്‍ കേന്ദ്രത്തില്‍ കഴിഞ്ഞിരുന്ന ഇന്ത്യന്‍ തടവുകാരില്‍ 1200 പേരെ കൂടി നാട്ടിലേക്കയച്ചു. ഫെബ്രുവരി അഞ്ച്, 15, 22 , മാര്‍ച്ച്‌ അഞ്ച് തീയതികളിലായി 300 പേര്‍ വീതമാണ് നാട്ടിലെത്തിയത്. സൗദി എയര്‍ലൈന്‍സ് മുഖേന ഡല്‍ഹിയിലേക്കാണ് ഇവരെ എത്തിച്ചിരിക്കുന്നത്.
താമസരേഖ പുതുക്കാതിരിക്കല്‍, ഹുറൂബ് കേസ്, തൊഴില്‍ നിയമലംഘനം തുടങ്ങിയ കുറ്റങ്ങള്‍ക്ക് പിടിയിലായി ജയിലിലടക്കപ്പെട്ടവരായിരുന്നു ഇവര്‍. യുപി നിന്നുള്ളവരാണ് ഇവരില്‍ മഹാഭൂരിപക്ഷം.
കേരളം, തമിഴ്‌നാട്, ആന്ധ്രപ്രദേശ്, തെലങ്കാന, ബിഹാര്‍, ബംഗാള്‍, രാജസ്ഥാന്‍, അസം, പഞ്ചാബ് എന്നീ സംസ്ഥാനങ്ങളില്‍ നിന്നുള്ളവരാണ് മറ്റുള്ളവര്‍. ഇതോടെ കൊറോണ വൈറസ് തുടങ്ങിയ ശേഷം സൗദിയില്‍ നിന്ന് നാടുകടത്തിയ ഇന്ത്യന്‍ തടവുകാരുടെ എണ്ണം 5808 ആയി ഉയര്‍ന്നു. റിയാദിലെ ഇന്ത്യന്‍ എംബസ്സി സെക്കന്‍റ് സെക്രട്ടറി സുനില്‍ കുമാര്‍, സഹ ഉദ്യോഗസ്ഥരായ രാജേഷ്, യൂസഫ് കാക്കഞ്ചേരി, അബ്ദുസമദ്, തുഷാര്‍ എന്നിവരാണ് ജയിലില്‍ കിടന്നവരെ നാട്ടിലയക്കാനുള്ള നടപടികള്‍ പൂര്‍ത്തിയാക്കിയിരിക്കുന്നത്.
കൊറോണ വൈറസ് പ്രതിസന്ധിക്ക് അയവ് വന്നതോടെ നിയമലംഘകരെ കണ്ടെത്തുന്നതിനുള്ള പൊലീസ് പരിശോധന സൗദിയില്‍ ശക്തമായി തുടരുകയാണ്. ഇന്ത്യക്കാരടക്കം നിരവധി വിദേശികളാണ് ദിനംപ്രതി പിടിയിലാകുന്നത്.
