ന്യൂഡല്‍ഹി: അഞ്ച് സംസ്ഥാനങ്ങളില്‍ നിയമസഭ തെരഞ്ഞെടുപ്പ് നടക്കാനിരിക്കെ നികുതി കുറച്ച്‌ എണ്ണവില പിടിച്ചു നിര്‍ത്താന്‍ നീക്കവുമായി കേന്ദ്രസര്‍ക്കാര്‍. ആഗോള വിപണിയില്‍ ക്രൂഡ് ഓയിലിന്‍റെ വില ഉയരുന്നതും കേന്ദ്രത്തെ ഇത്തരമൊരു തീരുമാനമെടുക്കാന്‍ പ്രേരിപ്പിക്കുന്നുവെന്നാണ് വിവരം.
പശ്ചിമബംഗാള്‍, അസം, കേരളം, തമിഴ്നാട്, പുതുച്ചേരി തുടങ്ങിയ സ്ഥലങ്ങളിലാണ് തെരഞ്ഞെടുപ്പ് നടക്കുന്നത്. ഈ സംസ്ഥാനങ്ങളിലെല്ലാം ഇന്ധന വില വര്‍ധനവ് പാര്‍ട്ടികള്‍ പ്രധാനപ്പെട്ട തെരഞ്ഞെടുപ്പ് പ്രചാരണ വിഷയമാക്കുന്നുണ്ട്. ഇത് ബി.ജെ.പിയെ പ്രതിരോധത്തിലാക്കുകയും ചെയ്യുന്നു. ഈയൊരു സാഹചര്യത്തിലാണ് നികുതി കുറച്ച്‌ തല്‍ക്കാലത്തേക്ക് ജനരോഷത്തില്‍ നിന്ന് രക്ഷപ്പെടാനുള്ള ശ്രമം.
ഫെബ്രുവരി 26 മുതല്‍ തെരഞ്ഞെടുപ്പ് പെരുമാറ്റചട്ടം നിലവിലുണ്ട്. എങ്കിലും ഇന്ധനനികുതി കുറക്കുന്നത് ദേശീയവിഷയമായതിനാല്‍ പെരുമാറ്റച്ചട്ടം ബാധകമാവില്ലെന്നാണ് വിലയിരുത്തല്‍. നിലവില്‍ രാജ്യത്ത് വില്‍ക്കുന്ന പെട്രോളിന്‍റെ റീടെയില്‍ വിലയുടെ 60 ശതമാനം നികുതികളാണ്. ഡീസലിലേക്ക് എത്തുേമ്ബാള്‍ വിലയില്‍ നികുതികളുടെ സ്വാധീനം 54 ശതമാനമാണ്.
