പ്രേക്ഷകർ ഏറെ ആവേശത്തോടെ കാത്തിരിക്കുന്ന മോഹൻലാൽ ചിത്രം ദൃശ്യം 2 ഈ മാസം 19ന് ആമസോൺ പ്രൈമിലൂടെ ആരാധകർക്ക് മുന്നിലെത്തും. ഇപ്പോഴിതാ ചിത്രത്തിന്റെ റിലീസിന് മുന്നോടിയായി ആരാധകരുടെ ചോദ്യങ്ങൾക്ക് ട്വിറ്ററിൽ മറുപടി നൽകിയിരിക്കുകയാണ് നടൻ മോഹൻലാൽ. ആരാധകരുടെ ചോദ്യങ്ങൾക്ക് രസകരമായ മറുപടികളാണ് മോഹൻലാൽ നൽകിയത്.
ആസ്ക് മോഹൻലാൽ എന്ന ഹാഷ്ടാഗിലാണ് മോഹൻലാലിനോട് ചോദ്യങ്ങൾ ചോദിക്കേണ്ടത്. ദൃശ്യം 2 തീയറ്ററിൽ റിലീസ് ചെയ്യുമോ എന്ന ചോദ്യത്തിന് സാധ്യതയുണ്ടെന്നായിരുന്നു മോഹൻലാലിന്റെ മറുപടി.
ദാസനേയും വിജയനേയും മിസ്സ് ചെയ്യുന്നു എന്ന് പറഞ്ഞ ആരാധകനോട് താനും മിസ്സ് ചെയ്യുന്നു എന്നായിരുന്നു മോഹൻലാലിന്റെ മറുപടി. ജഗതി ശ്രീകുമാറിനെ കുറിച്ച് ചോദിച്ചപ്പോള്‍ ദ കംപ്ലീറ്റ് ആക്ടര്‍ എന്നും മമ്മൂട്ടിയെക്കുറിച്ച് ചോദിച്ചപ്പോള്‍ കിടു എന്നുമായിരുന്നു ഉത്തരങ്ങള്‍.
അമ്മയുടെ പുതിയ ചിത്രത്തിൽ കില്ലർ റോൾ ചെയ്യുന്നത് ലാലേട്ടൻ ആണെന്ന് പറഞ്ഞാൽ അതേയെന്ന് പറയുമോ”? എങ്ങനെ അറിഞ്ഞു എന്നായിരുന്നു മോഹൻലാലിന്റെ മറുചോദ്യം.ലാലേട്ടന്റെ പ്രിയപ്പെട്ട കാർട്ടൂൺ ഏതാണെന്ന മറ്റൊരു ആരാധകന്റെ ചോദ്യത്തിനു ബോബനും മോളിയും എന്നായിരുന്നു മോഹൻലാൽ നൽകിയ മറുപടി.
