തിരുവനന്തപുരം: സിനിമാതാരം കൃഷ്ണ കുമാറിന്‍റെ വീട്ടിലേക്ക് അതിക്രമിച്ചു കയറി അക്രമം നടത്താന്‍ ശ്രമിച്ച സംഭവം ഗൗരവതരമാണെന്ന്​ ബി.ജെ.പി സംസ്​ഥാന പ്രസിഡന്‍റ്​ കെ. സുരേന്ദ്രന്‍. പ്രധാനമന്ത്രിയേയും ബി.ജെ.പിയേയും അനുകൂലിച്ചതിന്‍റെ പേരില്‍ കൃഷ്ണകുമാറിനെതിരെ നേരത്തെ സമൂഹ മാധ്യമങ്ങളില്‍ ചിലര്‍ വധഭീഷണി മുഴക്കിയിരുന്നു.

തീവ്രവാദ സ്വഭാവമുള്ള ചിലര്‍ അദേഹത്തിനെതിരെ നിരന്തരം സൈബര്‍ ആക്രമണം നടത്തുകയാണ്. ഇന്നലെ അദ്ദേഹത്തിന്‍റെ വീടിന്​ നേരെയുണ്ടായ അക്രമത്തില്‍ തീവ്രവാദ ശക്തികള്‍ക്ക് പങ്കുണ്ടോയെന്ന് പൊലീസ് അന്വേഷിക്കണം. കൃഷ്ണകുമാറിനൊപ്പം കേരളത്തിലെ മുഴുവന്‍ ബി.ജെ.പി പ്രവര്‍ത്തകരുമുണ്ടാവുമെന്നും കെ. സുരേന്ദ്രന്‍ പറഞ്ഞു.

വീട്ടില്‍ അതിക്രമിച്ച്‌​ കടക്കാന്‍ ശ്രമിച്ച മലപ്പുറം കൊണ്ടോട്ടി പുളിക്കല്‍ സ്വദേശി ഫാസില്‍ അക്ബര്‍ എന്ന യുവാവിനെ വട്ടിയൂര്‍ക്കാവ് പൊലീസ് അറസ്റ്റു ചെയ്​തിട്ടുണ്ട്​. ഞായറാഴ്ച രാത്രി ഒമ്ബതരയോടെയാണ് സംഭവം. ഗേറ്റിലടിച്ചു ഇയാള്‍ ബഹളംവെക്കുകയായിരുന്നു. കൃഷ്​ണകുമാര്‍ കാര്യം അന്വേഷിച്ചപ്പോള്‍ മറുപടി നല്‍കാതെ ഗേറ്റ് തുറക്കാന്‍ ആവശ്യപ്പെട്ടു. ഗേറ്റ് തുറക്കില്ലെന്ന്​ പറഞ്ഞതോടെ ഇയാള്‍ ചാടി അകത്തുകയറി. തുടര്‍ന്ന്​ വാതില്‍ ചവിട്ടി പൊളിക്കാന്‍ ശ്രമിച്ചതോടെ പൊലീസിനെ വിളിക്കുകയായിരുന്നു.

ഉടന്‍ തന്നെ പൊലീസെത്തി ഇയാളെ അറസ്റ്റ്​ ചെയ്യുകയായിരുന്നു. കൃഷ്ണകുമാറിന്‍റെ മകളും നടിയുമായ അഹാനയെ കാണാനാണ് എത്തിയതെന്ന് യുവാവ് പറഞ്ഞതായി പൊലീസ്​ അറിയിച്ചു.