പുണെ: വളര്‍ത്തുനായയെ വീട്ടുജോലിക്കാരന്‍ കൊലപ്പെടുത്തിയെന്ന പരാതിയുമായി നടി അയേഷ ജുല്‍ക. ലോണേവാലയിലെ വീട്ടില്‍ വളര്‍ത്തുനായ റോക്കിയെ ജോലിക്കാരനായ രാം അന്ദേര കൊലപ്പെടുത്തിയെന്നാണ് നടിയും ആക്ടിവിസ്റ്റുമായ ജുല്‍ക്കയുടെ പരാതി. ലോണേവാലയിലെ തെരുവില്‍ നിന്നും ജുല്‍ക എടുത്ത് വളര്‍ത്തിയ നായാണ് കൊല്ലപ്പെട്ടത്.
റോക്കിക്കൊപ്പം റിഗ്ഗലി എന്ന നായയേയും ജുല്‍ക എടുത്തു വളര്‍ത്തിയിരുന്നു. സെപ്തംബര്‍ 13നാണ് നായ ചത്തുവെന്ന ഫോണ്‍കോള്‍ മുംബൈയിലുള്ള ജുല്‍ക്കക്ക് ലഭിക്കുന്നത്. വീട്ടിലെ വാട്ടര്‍ ടാങ്കില്‍ മുങ്ങി മരിച്ചുവെന്നായിരുന്നു വീട്ടിലെ വേലക്കാരന്‍ പറഞ്ഞത്. എന്നാല്‍, വീട്ടിലെ ടാങ്കിന് വായ്വട്ടം കുറവായിരുന്നു കൂടാതെ നായയുടെ ശരീരത്തില്‍ പരിക്കുകളുമുണ്ടായിരുന്നു. ഇതോടെ നായയുടെ മരണം കൊലപാതകമാണെന്ന സംശയം ശക്തമായി. തുടര്‍ന്ന് മുംബൈയിലേക്കുള്ള യാത്രമധ്യ ലോണവാലയിലേക്ക് മടങ്ങിയ അയേഷ സംസ്കരിച്ച മൃതദേഹം പുറത്തെടുത്ത് പോസ്റ്റ്മോര്‍ട്ടം നടത്തിക്കുകയും ചെയ്തു. റിപ്പോര്‍ട്ടില്‍ ശ്വാസംമുട്ടിയാണ് മരണമെന്നും നായ മുങ്ങിമരിക്കാനുള്ള സാധ്യതകള്‍ കുറവാണെന്നും പരാമര്‍ശിച്ചതോടെ ജുല്‍ക ലോണേവാല പൊലീസ് സ്റ്റേഷനില്‍ പരാതി നല്‍കി.
പൊലീസ് അന്വേഷണത്തിന്‍റെ അടിസ്ഥാനത്തില്‍ കേസില്‍ കുറ്റപത്രം തയാറാണെന്ന് പൊലീസ് അറിയിച്ചു. വൈകാതെ കുറ്റപത്രം കോടതിയില്‍ സമര്‍പ്പിക്കും. എങ്കിലും ഫോറന്‍സിക് റിപ്പോര്‍ട്ട് ഉള്‍പ്പടെയുള്ളവ ലഭിക്കാത്തതിനാല്‍ കേസിന്‍റെ വിചാരണ നീണ്ടു പോവുകയാണെന്ന് ജുല്‍ക പറയുന്നു. ഫോറന്‍സിക് ഡിപ്പാര്‍ട്ട്മെന്‍റില്‍ അന്വേഷിച്ചപ്പോള്‍ മനുഷ്യരുടെ കേസുകള്‍ ബാക്കിയുണ്ടെന്നും അതുകഴിഞ്ഞിട്ട് മതി ഇതെന്നുമുള്ള മറുപടിയാണ് ലഭിച്ചതെന്ന് ജുല്‍ക പറഞ്ഞു. അതേസമയം, ഇക്കാര്യത്തില്‍ പ്രതികരണത്തിന് ഫോറന്‍സിക് ഡിപ്പാര്‍ട്ട്മെന്‍റ് തയാറായിട്ടില്ല.
