തിരുവനന്തപുരം: വാഹന രേഖകളുടെ കാലാവധി നീട്ടി. കാലാവധി അവസാനിച്ച വാഹനരേഖകള്‍ പുതുക്കാനുളള സമയം 2021 മാര്‍ച്ച്‌ 31 വരെ നീട്ടി. കോവിഡ് വ്യാപനത്തിന്റെ പശ്ചാത്തലത്തിലാണ് നടപടി. ഡ്രൈവിങ് ലൈസന്‍സ്, പെര്‍മിറ്റ്, ഫിറ്റ്നസ്, താല്‍കാലിക റജിസ്ട്രേഷന്‍ എന്നിവയുടെ കാലാവധിയാണ് കോവിഡ് വ്യാപനം കണക്കിലെടുത്ത് നീട്ടുന്നത്.

വാഹനങ്ങളുമായി ബന്ധപ്പെട്ട എല്ലാ രേഖകളും പുതുക്കാന്‍ അടുത്ത വര്‍ഷം മാര്‍ച്ച്‌ 31 വരെ സമയം നീട്ടി ഗതാഗത വകുപ്പ് ഉത്തരവിറക്കി. 1989ലെ മോട്ടോര്‍വാഹന ചട്ടത്തില്‍ പറയുന്ന എല്ലാ രേഖകള്‍ക്കും ഇത് ബാധകമാണ്. ഫെബ്രുവരി ഒന്നിന് സാധുത അവസാനിച്ച എല്ലാ രേഖകളും മാര്‍ച്ച്‌ 31 വരെ സാധുവായി കണക്കാക്കും. നിലവിലെ കോവിഡ് സ്ഥിതിഗതികളെ കണക്കിലെടുത്താണ് ഗതാഗതവകുപ്പീന്റെ നടപടി.

കൊറോണ വൈറസ് വ്യാപനത്തെ തുടര്‍ന്ന് ലോക്ഡൗണ്‍ പ്രഖ്യാപിച്ചതോടെ ഫെബ്രുവരി മുതല്‍ കാലാവധി അവസാനിക്കുന്ന വാഹനങ്ങളുടെ രേഖകള്‍ പുതുക്കുന്നതിന് സെപ്റ്റംബര്‍ 30 വരെ സമയം അനുവദിച്ചിരുന്നു. മാര്‍ച്ച്‌ 30-നാണ് ഇത് സംബന്ധിച്ച്‌ ഉത്തരവിറക്കിയത്. എന്നാല്‍, വൈറസ് വ്യാപനം തുടര്‍ന്ന സാഹചര്യത്തില്‍ വാഹനമേഖലയിലെ കടുത്ത പ്രതിസന്ധി പരിഗണിച്ച്‌ രേഖകള്‍ പുതുക്കുന്നതിനുള്ള സമയം ഡിസംബര്‍ 30വരെ നീട്ടി നല്‍കിയിരുന്നു. ഇതാണ് വീണ്ടും നീട്ടി നല്‍കിയിരിക്കുന്നത്