കുവൈത്ത് സിറ്റി: കുവൈത്തിലേക്ക് ഗാര്‍ഹികത്തൊഴിലാളികളെ കൊണ്ടുവരുന്നതിന് രജിസ്റ്റര്‍ ചെയ്യേണ്ട ഒാണ്‍ലൈന്‍ പോര്‍ട്ടല്‍ ആരംഭിച്ചു. https://belsalamah.com/home.html എന്ന വെബ്സൈറ്റിലാണ് രജിസ്റ്റര്‍ ചെയ്യേണ്ടത്. ഡിസംബര്‍ ഏഴുമുതല്‍ മടങ്ങിവരവ് ആരംഭിക്കുമെന്ന് നേരത്തെ അറിയിച്ചിരുന്നെങ്കിലും ഡിസംബര്‍ 14നാണ് ആദ്യ സംഘം ഇന്ത്യയില്‍നിന്ന് എത്തുന്നതെന്നാണ് പുതിയ വിവരം.
മൂന്നുനേരം ഭക്ഷണം ഉള്‍പ്പെടെ രണ്ടാഴ്ചത്തെ ക്വാറന്‍റീനും പി.സി.ആര്‍ പരിശോധനക്കും 270 ദീനാര്‍ ആണ് പാക്കേജ് നിശ്ചയിച്ചിരിക്കുന്നത്. വിമാന ടിക്കറ്റ് നിരക്ക് വിവിധ രാജ്യങ്ങളില്‍നിന്ന് വ്യത്യസ്തമാണ്. ഇന്ത്യയില്‍നിന്ന് 110 ദീനാറും ഫിലിപ്പീന്‍സില്‍നിന്ന് 200 ദീനാറും ശ്രീലങ്ക, നേപ്പാള്‍, ബംഗ്ലാദേശ് എന്നിവിടങ്ങളില്‍നിന്ന് 145 ദീനാറുമാണ് ടിക്കറ്റ് നിരക്ക്.
തൊഴിലാളികള്‍ സ്വന്തം രാജ്യത്തുനിന്ന് പി.സി.ആര്‍ പരിശോധന നടത്തി കോവിഡ് മുക്തമാണെന്ന് തെളിയിക്കണം. കുവൈത്തിലെത്തിയാല്‍ രണ്ടാമത്തെയും രണ്ടാഴ്ചത്തെ ക്വാറന്‍റീന്‍ കഴിഞ്ഞാല്‍ മൂന്നാമത്തെയും പി.സി.ആര്‍ പരിശോധന നടത്തും. കോവിഡ് ഇല്ലെങ്കില്‍ സ്പോണ്‍സര്‍ക്ക് കൂട്ടിക്കൊണ്ടുപോവാം. വൈറസ് ബാധിതരാണെങ്കില്‍ ചികിത്സ സര്‍ക്കാര്‍ ആശുപത്രിയില്‍ സൗജന്യമായി നല്‍കും. കുവൈത്ത് എയര്‍വേയ്സും ജസീറ എയര്‍വേയ്സുമാണ് വിമാന സര്‍വീസ് നടത്തുന്നത്.
