തിരുവനന്തപുരം: കോവിഡിന്‍റെ രണ്ടാം വ്യാപനം രാജ്യത്ത്​ രൂക്ഷമാകുന്നതിനിടെ കേരളത്തിലും കോവിഡ്​ നിയന്ത്രണം കടുപ്പിക്കുന്നു. ഇതിന്‍റെ ഭാഗമായി പൊലീസ്​ പരിശോധന കര്‍ശനമാക്കും. മാസ്​ക്​ ധരിക്കു​ന്നുണ്ടോ​െയന്നും സാമൂഹിക അകലം പാലിക്കുന്നുണ്ടോയെന്നും പൊലീസ്​ ഉറപ്പാക്കും. നിയന്ത്രണങ്ങള്‍ ലംഘിക്കുന്നവര്‍ക്കെതിരെ കര്‍ശന നടപടിയുണ്ടാകും. കോവിഡുമായി ബന്ധപ്പെട്ട കോര്‍കമ്മിറ്റി യോഗത്തിലാണ്​ തീരുമാനമുണ്ടായത്​.

കൂടുതല്‍ സെക്​ടറല്‍ മജിസ്​ട്രേറ്റുമാരെ നിയമിക്കാനും യോഗത്തില്‍ ധാരണയായിട്ടുണ്ട്​. ഇതര സംസ്ഥാനങ്ങളില്‍ നിന്നും വിദേശരാജ്യങ്ങളില്‍ നിന്ന്​ വരുന്നവര്‍ക്കും ഏഴ്​ ദിവസത്തെ ക്വാറന്‍റീന്‍ ഉറപ്പാക്കും. ഇപ്പോഴും ഈ നിര്‍ദേശം നിലവിലുണ്ടെങ്കിലും കര്‍ശനമായി പാലിക്കപ്പെടുന്നില്ല.​ഇത്​ കര്‍ശനമായി പാലിക്കാനുള്ള നടപടികള്‍ സ്വീകരിക്കും.

​തെരഞ്ഞെടുപ്പ്​ പ്രവര്‍ത്തനങ്ങളുടെ ഭാഗമായ പോളിങ്​ ഏജന്‍റുമാരെ കോവിഡ്​ പരിശോധനക്ക്​ വിധേയമാക്കും. രോഗലക്ഷണങ്ങള്‍ ഉള്ളവരെല്ലാം പരിശോധനക്ക്​ വിധേയമാകണം. സംസ്ഥാനത്തെ കോവിഡ്​ പരിശോധനകളുടെ എണ്ണം ഉയര്‍ത്താനും യോഗത്തില്‍ ധാരണയായി.