കാലിഫോര്‍ണിയ: 15 വയസുള്ള മകള്‍ക്കുണ്ടായ കുട്ടിയെ ബാത്ത് ടബ്ബില്‍ മുക്കി കൊന്ന കേസില്‍ 45 കാരിയായ ബിയാന്ത് കൗര്‍ ധില്ലന്‍ എന്ന യുവതിയെ കോടതി 29 വര്‍ഷം ജയില്‍ ശിക്ഷക്ക് വിധിച്ചു . പരോളില്ലാതെയാണ് ശിക്ഷക്ക് വിധിച്ചിരിക്കുന്നത്.യുവതി തന്നെയാണ് കൊല നടത്തിയതെന്ന് കെണ്‍ കൗണ്ടി സുപ്പീരിയര്‍ കോര്‍ട്ട് ജഡ്ജി കണ്ടെത്തി. കൊലപാതകം, കുട്ടികളെ ഉപദ്രവിക്കല്‍ തുടങ്ങിയ കുറ്റങ്ങളാണ് യുവതിക്കെതിരെ ചുമത്തിയിരിക്കുന്നത്. 2019 മാര്‍ച്ചില്‍ ബിയാന്ത് കൗറിന്റെ ഭര്‍ത്താവ് 48 വയസ്സുള്ള ജസ്ഗീര്‍ സിംഗ് ധില്ലന്‍ ആത്മഹത്യ ചെയ്തിരുന്നു. ബേക്കേഴ്സ് ഹില്ലിലായിരുന്നു കുടുംബം താമസിച്ചിരുന്നത്. 15 വയസ്സുള്ള മകള്‍ ഗര്‍ഭിണിയായതോടെയാണ് അവരുടെ ജീവിതം തകിടം മറിയുന്നത്.
2018-ല്‍ ആയിരുന്നു സംഭവം നടന്നത്. ഗര്‍ഭിണിയാണെന്ന കാര്യം മകള്‍ ആരേയും അറിയിച്ചില്ല. അയഞ്ഞ വസ്ത്രമുടുത്ത് വീട്ടുകാരില്‍ നിന്ന് പെണ്‍കുട്ടി വിവരം മറച്ചുവെച്ചു. എന്നാല്‍ 2018 നവംബറില്‍ പെണ്‍കുട്ടി വീട്ടിലെ ബാത്ത്റൂമില്‍ പ്രസവിച്ചു. ആര്‍ക്കെങ്കിലും ദത്തെടുക്കാന്‍ കൊടുക്കാം എന്ന് പറഞ്ഞ് അമ്മ ബിയാന്ത്, കുട്ടിയെ വാങ്ങി. തുടര്‍ന്ന് അവര്‍ കുട്ടിയെ ബാത്ത് ടബില്‍ മുക്കിക്കൊന്നു. കുട്ടിയുടെ ശരീരം ഒരു ബാഗിലാക്കി. അന്നു രാത്രി പിതാവ് ജസ്ഗിര്‍ സിംഗും മരുമകന്‍ ബക്ഷിന്ദര്‍ സിംഗ് മാനും (23) ചേര്‍ന്നു വീടിന് പുറകിലെ തോട്ടത്തില്‍ മൃതദേഹം കുഴിച്ചിട്ടു. കുടുംബത്തിന് ചീത്തപ്പേര് ഉണ്ടാകാതിരിക്കാനാണ് കുട്ടിയെ കൊന്നതെന്ന് ബിയാന്ത് സമ്മതിച്ചതായി പൊലീസ് റിപ്പോര്‍ട്ടില്‍ പറയുന്നു. സംഭവം കഴിഞ്ഞ് മാസങ്ങള്‍ക്ക് ശേഷമാണ്പൊലീസ് വിവരം അറിയുന്നത്.

ശിശുവിന്റെ ജഡം പിറകില്‍ കുഴിച്ചിട്ടിട്ടുണ്ടെന്നു തന്റെ സഹോദരന്‍ പറഞ്ഞതായി പെണ്‍കുട്ടി പൊലീസിനെ അറിയിച്ചു. പിതാവ് കൊല്ലുമെന്ന് ഭീഷണിപ്പെടുത്തുന്നതിനാല്‍ ആണ് സംഭവം പുറത്തു പറയാതിരിന്നതെന്ന് പെണ്‍കുട്ടി പറഞ്ഞു. കുട്ടി ചാപിള്ളയാണെന്നാണ് കരുതിയതെന്നാണ് ബിയാന്ത് ആദ്യം ചോദ്യം ചെയ്തപ്പോള്‍ പൊലീസിനോട് പറഞ്ഞത്. എന്നാല്‍ പിന്നീട് കുട്ടിയെ ബാത്ത് ടബ്ബില്‍ മുക്കികൊന്നതാണെന്ന് യുവതി സമ്മതിച്ചു.