ഒമാനില്‍ പ്ലാസ്റ്റിക് സഞ്ചികളുടെ നിരോധനം പൂര്‍ണമായി നടപ്പാക്കാനുള്ള തീരുമാനവുമായി ഒമാന്‍ പരിസ്ഥിതി അതോറിറ്റി മുന്നോട്ട്. രണ്ടുമാസത്തിനുള്ളില്‍ വ്യാപാര സ്ഥാപനങ്ങളില്‍ കട്ടി കുറഞ്ഞ പ്ലാസ്റ്റിക് സഞ്ചികള്‍ പൂര്‍ണമായി ഒഴിവാക്കാനാണ് സമിതിയുടെ നീക്കം.
ജനുവരി ഒന്നു മുതലാണ് കട്ടി കുറഞ്ഞ പ്ലാസ്റ്റിക് സഞ്ചികളുടെ ഉപയോഗത്തിന് ഒമാനില്‍ വിലക്ക് ഏര്‍പ്പെടുത്തിയത്. അതോടെ പ്ലാസ്റ്റിക് സഞ്ചികളുടെ ഉപയോഗം ഗണ്യമായി കുറഞ്ഞിട്ടുണ്ട്. എന്നാല്‍, വ്യാപാര സ്ഥാപനങ്ങളില്‍ പച്ചക്കറികളും മറ്റും പാക്ക് ചെയ്യുന്നതിന് കട്ടി കുറഞ്ഞ സഞ്ചികളാണ് ഇപ്പോഴും ഉപയോഗിക്കുന്നത്്. ഇതടക്കം ചില മേഖലകളില്‍ മാത്രമാണ് ഉപയോഗത്തിന് ഇളവുള്ളത്. ഇതുകൂടി ഒഴിവാക്കാനുള്ള നീക്കങ്ങളാണ് പരിസ്ഥിതി അതോറിറ്റി നടത്തുന്നത്.
